- Advertisement -

شمارات.. سلك: كان مالقيت البتريدو

- Advertisement -

0

 

- Advertisement -

*الركشات دي ماتشوفوها كده تقولوا لافة ساي

*الركشات دي ناقشة كلو شي

*عشان كده ما لافة ساي لافة فوق راي

*ناقشة الحاصل وحافظة الدروب

*وبتنقل كل الأشياء

*العيان تنقلوا

*التريان تنقلوا

*تلفونات الجكس لما يركبنها كلها الركشة سامعاها

*أصلو من وجهة نظر الجكس سواق الركشة زي سيد اللبن مامنهم اختشاء

*سيد اللبن ممكن يقابلنوا بأي لباس

*إذا في يعني

*وبتاع الركشة ممكن يقابلنوا بأي كلام

*الغاشنو العايشنو والمثبتنو

*وأقيف هنا جمب اللاندكروزر دي

*وتنزل

*وينزل بتاع الكروزر يحاسب الركشة

*موش قلت ليكم الركشة ناقشة كلو شي

*وبتنقل كمان أي شي

*سيد العيش وعيشو وسيد البنقو و(عيشو)

*وست الموية بي مويتها

*ومرات الموية براها بدون ستها

*الركشة مالافة ساي

*لافة فوق راي

*لذا

*الكلام المكتوب على الركشات ده ماكلام ساي

*ده واقع وبشكل راي

*بتاع ركشة كاتب

*كان مالقيت البتريدو ريد البتلقا

*الكلام ده كبير

*الزمن بقى زمن سرعة وإنجاز

*قصة تبكي على غياب الحبيبة وتكتب شعراً وتربي شعراً (بفتح الشين)

*وتسكر وتخلي المدرسة وما تستحمى وتقعد تسمع هاشم ميرغني

*ويادار عبلة

*عبلة بالبا؟؟؟

*دي قصة انتهت

*وحكاية المحبوبة راجية الحبيب متشنقلة الليل كلو تعد في النجوم

*وبالنهار تشتغل منديل حرير لحبيب بعيد دي قصة انتهت

*حبيب بعيد وين يا

*أسي في حبيب واسبير حبيب

*منديل حرير شنو

*منديل ورق وانتهينا

وعشان بيع المشاعر ده وسرعة التخلي كتب بتاع ركشة

*ياربي تبوري لما تظبط أموري

*وتناولت كتابة الركشات جميع مناحي الحياة

*اختصرت واقع الطب بتاعنا في عبارة مكتوبة على ركشة تقول

*العملية نجحت والمريض مات

*وحتى الحفاظ على أخلاقيات المجتمع وقفل الأبواب التي تأتي عبرها الريح

*فجاءت عبارة تجسد ذلك على ظهر ركشة تقول

*كترت الهدايا بتودي الداية

*وحفاظاً على الكرامة واحترام النفس والعزة

*قدمت الركشة محاضرة طويلة جداً في بلد كسير التلج هذه وأمرت بضرورة حفظ ماء الوجه

*كل ذلك جاءت به الركشة في عبارة تقول

*القلب الماعندك فيهو مقعد ماتقيف فيهو شماعة

*وحكم الركشة التي تقدمها للمجتمع كتيرة جداً ومهمة

*فالعبارات المكتوبة على الركشات هي أساليب للتربية تعمل على هداية المجتمع

*عشان كده الركشات مالافة ساي لافة فوق راي

*عزيزي المواطن

*لما توقف ركشة احرص تقرأ مكتوب عليها شنو

*عشان تستفيد

أها

*نجي لي شمارات والي الخرتوم

*تعرف ياوالينا

*مضارياك عن كتابة الركشات السارينا

*حاول أمشي بدون سارينا

*عشان تعرف حقيقة الحاصل لينا

شمارات الكلب

ننساك كيف والكلب قال مكتوب في ركشة لمتين ياناس؟؟؟؟

عد لمتين ياناس

أو تلقى مكتوب على ركشة من المؤسف أن تعيش في وطن حلمك مغادرته.

وإلى لقاء

سلك.

- Advertisement -

أضغط هنا لقراءة الخبر من المصدر

Leave A Reply

Your email address will not be published.

Share via