- Advertisement -

شمارات.. سلك: باقي كلام الركشة

- Advertisement -

0


- Advertisement -

- Advertisement -

*امس اتكلمنا عن كلام الركشة

*الركشة ما لافة ساي

*لافة فوق راي

*وقلنا الركشة قالت

*كان مالقيت البتريدو ريد البتلقا

*أها

*في ناس لما مالقوا الوطن البريدوهو

*مافتشوا عنو

*هاجروا منو

*ورادوا الوطن اللقوهو

*هاجروا في زمن غناهو كان كلو للوطن البئن مجروح

*كان الغنا

*كلاما اصلو مامعقول نسيبك انت وين ونفوت

*نشوف وطنا مكان تاني

*وانت الدمعة في عينيك مصدر همي واحزاني

*****

*دموع الفرقة فيك ظاهرة

*ودايما فرقتك حارة

*بتبكي على فراق ولدك

*وولدك ايدو بيك بارة

*وانت الدمعة في عينيك مصدر همي واحزاني

*سبحان الله

*وقت الغنا ده غنوا معانا وطفشوا

*وبقيت الدمعة في عيون الوطن حااااضرة على فراق اولادو وماجفت مآقينا

*الركشة ماساهلة

*وبرضو لو تتذكروا الكلب لما قال الركشة مكتوب فيها

*من المؤسف ان تعيش في وطن حلمك مغادرته

*كلام ياعوض دكام

*كلام بقطع قلب وطن يعاني الجراح واولادو قمة طموحهم مغادرته

*زول ساي يقعد يمارض الوطن مافي

*تخيلوا بمناسبة قمة الطموح المغادرة

* صاحبي قال لي المقعدك شنو؟اتخارج

*قلت ليهو الاولاد

*قال لي عشان خاطرهم لازم تتخارج عشان تريحهم

*قلت ليهو لو اتخارجت في العمر ده بتلتلهم

*قال لي كيف؟

*قلت ليهو يبقوا في الجثمان بجي متين

*بي تاركو ولا بدر

*وناس المطار اضربوا

*تلتلة شديدة

*يبقوا في ماشين المطار وجايين من المطار

*لو بي ركشة دايرين ليهم سبعين مليون حوامة

*ولو جثماني وصل وشالوهوا من المطار بي توكتوك دايرين ليهم مية وعشرين مليون

*اصلو انا مرسل ليهم كم قبل وفاتي؟؟؟؟

*اخير الزول يتندل ليهم هنا

*من القوة للهوة او من حوادث امدرمان للبكري

*دقيقتين وينتهي العزاء

*لاصرف لاتلتلة

*أيها الناس

*صدقوني

*موش اي وفاة عندها اسباب؟

*هبوط في الدورة الدموية(سبب عام)

*توقف التنفس(كورونا)

*حكة شديدة(جدري قرود)

*فقدان سوائل(كوليرا)

*نزيف بالمخ(فكر في الحياة كتير)

*شق بالجمجمة(طقتو مرتو بيد الفندك)

*رضرضة بالعظام وتهشم بالقفص الصدري(حادث حركة)

*طلق ناري اخترق الرأس(في موكب يطالب بوطن شاسع)

*في اللفة(كلب ليدو )

*صدقوني انا سبب وفاتي(بعد خرف يايمة)حايكون الناس اللما مالقت السودان البتريدو رادت المهجر

المهم

*يقال ان الكاتب الفرنسي اتيان دولايواسيه قال في كتابه العبودية الاختيارية ما يلي

*عندما يتعرض شعب لقمع طويل تنشأ اجيال لاتحتاج للحرية وتتواءم مع الاستبداد ويظهر مايسمى بالمواطن المستقر الذي تنحصر اهتماماته في

*الدين

*لقمة العيش

*كرة القدم

*فالدين عند ذلك المواطن لاعلاقة له بالحق والعدل

*بل مجرد طقوس تؤدى لاتنصرف للسلوك

*فمن يكذب وينافق ويرشي ويرتشي لا يتحرج من افعاله تلك

*ولكنه يحس بالذنب فقط ان فاتته احدى الصلوات

*أما لقمة العيش فهي مجال اهتمام ذلك المواطن الثاني حيث انه لايهتم بالحقوق السياسية ولكنه يهتم بتربية أطفاله تحت ضل حيطة او ضل دليبة

*اما كرة القدم فهي الاهتمام الثالث لذلك المواطن المستقر

*يعشقها بجنون لانها طيلة تسعين دقيقة تحقق امامه عدالة هو يفتقدها لانها تقوم على قواعد واضحة تطبق على الجميع

*أيها الناس

*عليكم الله فينا كم مليون مواطن مستقر؟؟؟؟

*ومستقرين على رماد شنو؟؟؟

*لادين ولا عيشة ولا حتى كورة

*كلو يوم ماخدين خمسة وستة

*غايتو يا الركشة

*حتى اتيان في فرنسا صوتك وصلو؟؟؟

*مابصلو كيفن عاد وانتي فاكة عادمك ومطرطرة في الدنيا على كيفك

*أها

*نجي لي شمارات والي الخرتوم

*كان شفت يا والينا

*الطفش طفش والقعدوا على قول إتيان كلهم مواطنين مستقرينا

شمارات الكلب

ننساك كيف والكلب قال قلت لي تكضب وتمشي الساحة الخضراء!!!! دينكم ذاتو ….حيرنا

وإلى لقاء

سلك

لقراءة الخبر من المصدر إضغط هنا

Leave A Reply

Your email address will not be published.

Share via