الحاصل نيوز
مقالات

مهادن الزعيم يكتب: مالوا زعلان ؟

Advertisement

✵ لحدي يوم امس الوضع كان عادي وخبر الانقلاب مر مرور الكرام ذي م مرت سبعة انقلابات قبلو (كلها كلمونا بيها الصباح وقالو لينا كان في انقلاب بس نحن صديناهم وهكذا) المهم كنا بنمشي الموضوع مع اننا لحدي الان م شفنا عسكري اتحاكم بإنقلاب ….
✵ بس بعد خبر الانقلاب ونزول دبابات للشوارع وفي مدخل الكباري حسينا انو الموضوع المرة دي مختلف وبرضو طلع علينا السيد رئيس المجلس السيادي وقال كام في انقلاب وحسمناهو (لحدي هنا الجزء دا مكرر وحضرناهو سبعة مرات من 11 ابريل للان) لكن الغريب في الحصل بعد داك …
✵ الليلة في خطاب للسيد رئيس المجلس السيادي كان بتكلم بزعل وقال (كيف يقولو علي الجماهير ان تنزل الى الشوارع لحماية ثورتها) واضاف يحموها من منو? ?? مننا نحن?? .. كدي خلينا ي سعادتك نسألك سؤال (انت زعلان مالك?? ) فاكر نفسك انك المسؤول الوحيد عن حماية الثورة ولا شنو?? ? الثورة دي حقت الشعب ياسعادتك وهو مستعد يحميها من الكل ياسعادتك بما فيهم انت والمدنيين …
✵ واضاف السيد (رئيس المجلس السيادي) متسائلا (وين الشباب الكانت معتصمة في القيادة وناضلوا وقدموا شهداء ???) ونسي سعادته ان الشهداء هؤلاء سقطوا برصاص الاجهزة الامنية على مرمى حجر من مكتبه وهو لم يحرك ساكنا …
✵ واضاف سيادته (ان شعارات الثورة ضاعت بين المناصب والمكاسب) وتغافل عمدا عن دماء الشهداء الضاعت من اجل ان يصبح هو رئيسا للمجلس السيادي …
✵ اكمل سعادته (يحمو الثورة من منو?? من نحن? ? ) وكأن سيادته قد نصب نفسه هو الحامي الوحيد للثورة … ايوة ي سعادتك يحموها منك ومن اي كائن كان يريد ان يقوض اركان الديمقراطية اليادوب ختينا اول طوبة فيها بدماء شهداء اطهر واكرم منكم جميعا مدنيين على عساكر …
✵ الشباب الناضلوا اربعة شهور حسوم ذاقوا فيها الامرين من تنكيل وضرب واعتقال وقتل وتعذيب واعتصمو قدام القيادة ل58 يوما ياسعادتك جلهم كرهوا السياسة ووسخها وكسرو الحنك لكنهم مستعدين ينزلو الشوارع بكرة لو فكر عسكري مجرد تفكير ان يعمل انقلاب ويحكم البلد دي تاني …
✵ قبل ان نفيق من خطاب السيد رئيس المجلس السيادي خرج علينا نائبه في منشور على صفحته على الفيسبوك ليقول (ان اسباب الانقلاب هو فشل الحكومة وتردي الحالة الاقتصادية) والغريبة انه تجاهل تماما الانفلات الامني المفروض انهم مسؤولين منو قدام الله وقدام الشعب ….
✵ واصل السيد نائب رئيس المجلس السيادي هجومه قائلا (ان القوات الامنية تتعرض للاساءات عشان كدا بعملو انقلابات) وطبعا دا كلام غريب ومريب لانو نفس السبب الكان بتقال قبل فض الاعتصام (انو الاساءات اثرت علي نفسيات العساكر) طيب وبالنسبة للموت المجاني في شوارع الخرطوم بسبب النهب والسرقة رايكم شنو. …
✵ اضاف سعادته انهم وضعوا كافة امكانياتهم لمساعدة الحكومة (طبعا الكلام دا غريب اذا كان كافة امكانيات العسكر من دعم سريع وجيش وامن وحركات المسلحة قرابة النص مليون عسكري ماقادرة تفرض الامن في قلب العاصمة ناهيك عن الاطراف والولايات ف امكانياتكم دي اخير عدمها ي سعادتك) ….
✵ على السيد رئيس المجلس السيادي ونائبه ان يفهموا ان هذه الحكومة الضعيفة الفاقدة للسيادة الوطنية المرتهنة للغرب والبنك الدولي الفاشلة في ادارة الاقتصاد ومعاش الناس هي السبب الرئيسي لبقائهما في مناصبهما بعد ان وفرت لهم الحصانة المؤقتة من خلال الوثيقة الدستورية (المعطوبة) وان سقوطها يعني سقوطهم كلهم بلا شك (كلكم فشلة الله ابتلانا بيكم مدنيين على عساكر والمشكلة انكم انتو الزعلاتين وبتردحوا لي بعض والشعب ساكت لكن وقت يقوم ح تعرفوا الطفا النور منو) ….
الله غالب
Advertisement

Related posts

ثنائية على شبيكه والسني الضوي في الكتابة والتلحين السهل الممتنع والجمل اللحنية الساحرة

جنا النديهة

حين يكتب ضابط عظيم .. على الجميع يكتب مرتين ..!

1 تعليق

تم أغلاق التعليقات